Një turist gjerman u godit mesditën e kësaj të diele nga helika e një gomonoje në zonën bregdetare të Gjipesë. Policia e Vlorës sqaroi se turisti ishte zhytur jashtë perimetrit të sigurisë, ndërsa drejtuesi i mjetit 27 vjeçari Krenar Velaj rezulton i pajisur me dokumentacion të rregullt dhe lëvizte me mjetin e tij lundurues në rrugën detare të përcaktuar për mjetet lundruese si ato te peshkimit por dhe ato turistike. Ngjarja e rëndë ndodhi orës 13:49, ndërsa turisti gjerman 47 vjeç i zhytur larg zonës së përcaktuar dhe pa masa mbrojtëse mësohet të jetë goditur nga helika në shpatull dhe këmbë. Ndihma e parë këtij të fundit i është dhënë nga vetë drejtuesi i gomones i cili ka njoftuar dhe policinë kufitare. Turisti i plagosur është shoqëruar fillimisht drejt spitalit të Himarës dhe më pas me helikopter drejt Tiranës. Policia e Vlorës ka bërë sakaq shoqërimin e drejtuesit të gomones duke nisur edhe marrjen e tij në pyetje bashkë me disa dëshmitarë të ngjarjes. Që ngjarje të tilla të mos përsëriten me, policia e Vlorës apelon për çdo turist që zhytet për sport apo dhe për peshkim të marrë masat mbrojtëse që nga flamuri i cili duhet të qëndroj në det ku dhe ai është zhytur por edhe të shmangin zonat ku kalojnë mjetet lundruese.