Gjykata Ndërkombëtare e Drejtësisë tha se prania e Izraelit në territoret e pushtuara palestineze është “e paligjshme”, duke bërë thirrje që t’i jepet fund menjëherë ndërtimit të vendbanimeve. Ky është një dënim i paprecedent i lëshuar nga gjykata, lidhur me sundimin e Izraelit mbi tokat që i ka pushuar 57 vjet më parë. Kryeministri izraelit, Benjamin Netanyahu, menjëherë dënoi vendimin – që nuk është ligjërisht i obligueshëm – i lëshuar nga një panel prej 15 gjyqtarësh. Ai tha se territoret janë pjesë e “atdheut” historik të popullit hebre. komenti i lëshuar nga gjyqtarët e GJND-së mund të ndikojë në opinionin ndërkombëtar dhe të nxisë lëvizje për njohjen e njëanshme të një shteti palestinez. Gjykatësit përmendën një listë të gjatë të politikave, përshirë edhe ndërtimin dhe zgjerimin e vendbanimeve izraelite në Bregun e pushtuar Perëndimor dhe Jerusalemin Lindor, përdorimin e burimeve natyrore në këto zona, aneksimin dhe vendosjen e kontrollit të përhershëm ndaj tokave dhe politikave diskriminuese ndaj palestinezëve. Të gjitha këto, thanë gjyqtarët, përbëjnë shkelje të ligjit ndërkombëtar. Gjykata tha se Izraeli nuk ka të drejtë të sovranitetit në këto territoret. Po ashtu tha se shteti po shkel ligjet ndërkombëtare, që ndalojnë marrjen e territoreve me forcë dhe po ashtu akuzoi Izraelin se po pengon të drejtën e palestinezëve për vetëvendosje.