Gjermania është një nga vendet që i shtrëngoi ndjeshëm masat anti-Covid në përpjekje për të përballuar valët e njëpasshme të pandemisë, por një nga anëtarët e kabinetit qeveritar thotë se muajin e ardhshëm, kufizimet mund të hiqen. “Shpresoj se në mars, do të rrëzohen shumë nga masat e deritanishme mbrojtëse”, tha për gazetën “Rheinische Post ” ministri i Drejtësisë, Marco Buschmann . Gjithcka duket se do të varet nga ecuria e situatës epidemiologjike në vend javët në vijim. Nëse nga mesi i shkurtit infektimet do të bien, cka pritet të ndodhë vërtet, atëherë masat do të zbuten ndjeshëm. Por nëse kjo nuk ndodh e zhvillohen variante të reja të koronavirusit, autoritetet do të dalin me një plan tjetër veprimi. Gjatë pandemisë, iu la në dorë secilit prej 16 landeve gjermane që të vendosnin se cfarë masash kufizuese do të aplikonin në rajonet e tyre. Qeveria federale kishte zhvilluar megjithatë takime të rregullta me krerët e tyre për t’u koordinuar mbi rregullat e shëndetit publik. Takimi i radhës i kancelarit Olaf Scholz me liderët rajonalë është caktuar të mbahet në 16 shkurt. Aktualisht në Gjermani klubet e natës, mbeten të mbyllura, ndërsa restorantet, baret, dyqanet e vende të tjera duhet të kontrollojnë nëse klientët janë vaksinuar ose shëruar nga koronavirusi, në të kundërt, nuk u lejohet hyrja. Nga kërkesa e testimit janë përjashtuar personat që kanë marrë dozën e tretë përforëcuese të vaksinës.