Pikërisht në kohën kur Brukseli mendoi se tashmë marrëveshja tregtare me SHBA-hnë ishte punë e kryer, Donald Trump iu rikthye gjatë fundjavës kërcënimit me tarifa shtesë. Njoftimi i Donald Trumpit më 12 korrik - për vendosjen e një tarife të përgjithshme prej 30 për qind për të gjitha importet nga blloku me 27 vende anëtare – e tronditi Bashkimin Europian. Blloku ende shpreson se një ujdi do të mundë të arrihet para afatit të 1 gushtit, kur pritet të hyjnë në fuqi tarifat ndëshkuese të SHBA-së. Por, BE-ja gjithashtu ka përgatitur kundërmasa, duke rritur mundësinë e një lufte tregtare me pasoja të rënda për ekonominë botërore. Diplomatët dhe politikanët europianë besojnë se një marrëveshje transatlantike ishte shumë pranë, duke lënë të kuptohet se mund të pranohej një tarifë bazë prej rreth 10 për qind, me përjashtime dhe kuota për industri të ndryshme që do të shtjelloheshin më vonë. Duke preferuar të ruajnë anonimitetin ata e përshkruajnë kthesën e papritur nga Shtëpia e Bardhë si një “taktikë” për të negocjuar arritjen e një marrëveshjeje më të mirë për Shtetet e Bashkuara, e sidomos për kompanitë teknologjike amerikane që përballen me taksa të rritura në Europë. Për momentin, shpresat e BE-së janë që të mund të arrihet një lloj kompromisi përpara 1 gushtit, qoftë ky edhe vetëm një shtyrje me disa muaj. Brukseli shprehet i gatshëm të pranojë tarifën prej 15 për qind si kufi maksimal pa ndërmarrë masa hakmarrëse.