Presidenti turk Rexhep Tajip Erdogan i bëri thirrje Presidentit amerikan Donald Trump të marrë drejtimin në ushtrimin e presionit ndaj Izraelit për të ndaluar shkeljen e armëpushimit me Hamasin, duke pretenduar se grupi militant islamik po i përmbahej armëpushimit. Vërejtjet e Erdogan u raportuan nga mediat shtetërore turke. Armëpushimi i brishtë është faza e parë e planit historik të paqes prej 20 pikash të Trump. Ai përfshin tërheqjen e forcave izraelite brenda Gazës dhe kthimin e plotë të pengjeve në Izrael si edhe lirimin e rreth 2,000 të burgosurve palestinezë. Faza tjetër bën thirrje për çarmatimin e Hamasit dhe heqjen dorë nga kontrolli në Gaza. Hamasi ende nuk është zotuar për asnjërën nga këto dy kërkesa. Izraeli e ka akuzuar Hamasin për shkelje të shumta të marrëveshjes së armëpushimit, duke përfshirë të shtënat ndaj trupave të forcave mbrojtëse izraelite dhe vonesën e dorëzimit të trupave të pajetë të pengjeve të mbetur në Gaza.