Shtetet e Bashkuara kanë shqetësime serioze që rezultatet e publikuara prej autoritetit zgjedhor të Venezuelës, të cilat e shpallin presidentin Nicolas Maduro fitues për një mandat të tretë, nuk reflektojnë votat e popullit, ka thënë sot Sekretari amerikan i Shtetit, Antony Blinken. Vetëm pak minuta pasi u shpall se Maduro i ka fituar zgjedhjet presidenciale, Blinken e ka ndërprerë fjalimin në një takim të kombeve të Indo-Paqësorit, për të komentuar mbi zhvillimet. “Ne e kemi parë njoftimin e Komisionit zgjedhor të Venezuelës. Ne kemi shqetësime serioze që rezultatet nuk reflektojnë vullnetin e popullit të Venezuelës”, tha Blinken. Ai u shpreh se komuniteti ndërkombëtar është duke i shikuar nga afër zhvillimet atje. “Është shumë e rëndësishme që secila votë të numërohet saktë dhe në mënyrë transparente, që zyrtarët zgjedhorë të shpërndajnë menjëherë informacionin me vëzhguesit opozitarë dhe ata zgjedhorë, pa asnjë vonesë, dhe që autoritetet për zgjedhje t’i publikojnë tabletat e detajuara të votave”, u shpreh Blinken.