Dita e Pavarësisë u festua edhe në institucionet arsimore para se nxënësit të merrnin pushimet. Shkolla “Myslym Keta” në Tiranë dhuroi një spektakël artistik nga nxënësit. Klasat e gjimnazit u ndanë në 12 qarqe për të prezantuar veçoritë e Shqipërisë, nisur nga historia, për të shpalosur traditat, kulturën dhe kulinarinë e çdo zone. “U mblodhëm pranë sofrës me ushqimet tradicionale të Dibrës për të sjellë më të mirën e këtij qarku.” “Ky është edhe më shumë muaji që na bën të ndihemi krenarë për vendin tonë, për këtë flamur!”, thonë nxënësit. Ky aktivitet i të rinjve, nën kujdesin e arsimtarëve, u zhvillua në prezencë edhe të familjarëve të tyre, në kuadër të programit “Art dhe Zeje”, që shkon përtej misionit të mësimdhënies. “Shkolla jep dije, por edhe zbulon talentet e nxënësve. Sot ata u ndjenë të përfaqësuar, kush në këngë, kush në pikturë, kush në kërcim…”, shprehet drejtoresha e shkollës. Gjimnazistët vlerësuan rëndësinë e mbajtjes gjallë të folklorit, si dhe nderimin e personaliteteve kombëtare.