Misioni i Bashkimit Evropian për Sundim të Ligjit në Kosovë (EULEX) hodhi poshtë pretendimet e zyrtarëve serbë se nuk është lejuar që të marrë pjesë në operacionin policor më 24 shtator në Banjskë të Zveçanit, pasi u sulmua Policia e Kosovës. “EULEX-i në asnjë mënyrë nuk është ndaluar që të marrë pjesë apo të vëzhgojë operacionet që janë kryer nga Policia e Kosovës më 24 shtator. Pas sulmit të kryer ndaj Policisë së Kosovës, patrullat e njësisë policore të EULEX-it dhe Njësisë policore rezervë, por edhe pjesëtarë të tjerë të stafit kanë qenë në kontakt të ngushtë me Policinë e Kosovës dhe kanë shkuar në zonën përreth manastirit të Banjskës në veri të Kosovës”, deklaruan ata për Radio Evropa e Lirë. Me deklaratën e fundit EULEX-i hodhi poshtë të gjitha pretendimet e presidentit të Serbisë, Aleksandar Vuçiç, dhe shefit të zyrës për Kosovën në Qeverinë serbe, Petar Petkoviç, se Kosova nuk e lejoi misionin e BE-së që të marrë pjesë në operacionin policor pas sulmit ku mbeti i vrarë rreshteri Afrim Bunjaku. Ata shtuan se nga ky mision kanë monitoruar nga afër operacionin policor dhe kanë qenë në kontakt të ngushtë me Policinë e Kosovës dhe misionin paqeruajtës të NATO-s në Kosovë, KFOR-in. Ndërkohë lideri serb ka bërë dy reagime së fundmi ku njoftoi se Serbia do të hetojë ngjarjet që çuan në sulmin me armë në veri të Kosovës, për të cilin Prishtina zyrtare ka fajësuar Beogradin. Aleksandër Vuçiç mohoi çdo përfshirje të qeverisë në incident dhe se Beogradi dënon vrasjen e policit, njëkohësisht shtoi se Serbia do të nisë procedurat përpara organeve përkatëse gjyqësore dhe do të hetojë të dyshuarit. Pavarësisht reflektimit nga ana e tij, për Reuters, presidenti serb tha se shkaku i të gjitha problemeve në Kosovë është Albin Kurti. Ndër të tjerat nuk mungoi as thirrja për tërheqjen e pjesëtarëve të Policisë së Kosovës nga veriu i vendit.