Një zjarr përfshiu Kodër Krastën në Elbasan mesditën e së martës. Me gjithë ndërhyrjen e menjëhershme të zjarrfikëses, të ndihmuara nga era dhe temperaturat e larta, flakët u përhapën me shpejtësi. 4 mjete zjarrfikëse dhe rreth 20 efektivë vunë nën kontroll flakët dhe fikën zjarrin pas disa orësh. E konsideruar mushkëria e gjelbër e Elbasanit, vit pas viti pyjet me pisha të Krastës po dëmtohen rëndë nga zjarret e pothuaj çdo vere. Qindra pemë pishe janë djegur nga zjarret masive që e kanë përfshirë kodrën në juglindje të Elbasanit në vitin 2017, 2019, 2020 dhe 2022. Fushatat e herë pas hershme të pyllëzimeve nuk kanë mundur të rekuperojnë dëmin e shkaktuar nga zjarret. Shumica e zjarreve të identifikuara në Krastë të Elbasanit kanë qenë të qëllimshme, por nuk kanë munguar edhe rastet e pakujdesive për shkak të cigareve të ndezura, apo qirinjve që shpesh besimtarët vendosin në të ashtuquajturin “vendi i mirë” në Kodër Krastë.