Një ngjarje tragjike ka ndodhur në fshatin Labinot Fushë të Elbasanit pasditen e së premtes ku dy fëmijë 7 dhe 9 vjec janë mbytur në ujërat e lumit Shkumbin. Dy vëllezërit Bica çdo pasdite së bashku me prindërit e tyre ruanin bagëtitë në luginën e lumit Shkumbin. Ende është e paqartë sesi fëmijët i kanë humbur vëmendjes së prindërve dhe kanë shkuar të lahen në lumë. Fillimisht ka qenë roja i një objekti pranë që ka parë fëmijët dhe ka lajmëruar ambulancën e policinë, por askush nuk ka mundur t’i shpëtojë. Edhe pse në këtë stinë lumi Shkumbin nuk ka rrjedhë të rrëmbyër, në gjerësinë e shtratit të tij ka gropa të mëdha që bëhen fatale. Ky nuk është rasti i parë që fëmijë apo edhe të rritur mbyten në ujërat e lumit Shkumbin të gënjyër nga rrjedha e tij e qetë. Autoritetet kanë nisur hetimet për të zbardhur rrethanat e plota të kësaj tragjedie.