Bashkimi Evropian do të njoftojë së shpejti një paketë të nëntë sanksionesh ndaj Rusisë në përgjigje të sulmit ndaj Ukrainës, tha shefja e Komisionit Evropian Ursula von der Leyen gjatë një vizite në Finlandë të enjten. “Ne po punojmë fort për të goditur Rusinë aty ku i dhemb më shumë në mënyrë që të dobësojmë kapacitetin e saj për të vazhduar luftën kundër Ukrainës.”, tha von der Leyen. " Ne nuk do të pushojmë, tha ajo, derisa Ukraina të falë fitimtare mbi Putinin dhe luftën e tij të paligjshme dhe barbare," por nuk dha detaje se çfarë masash mund të përmbajë një raund i ri i sanksioneve të BE-së. Muajin e kaluar BE-ja dha një miratim përfundimtar për paketën e tetë të sanksioneve mbi pushtimin, duke përfshirë më shumë kufizime në tregtinë e çelikut dhe produkteve të teknologjisë. Në një konferencë të përbashkët shtypi me kryeministrat e Finlandës dhe Estonisë dhe zëvendëskryeministren e Suedisë, von der Leyen tha se sulmet e Rusisë ndaj infrastrukturës civile të Ukrainës, si furnizimi me energji elektrike, janë krime lufte. Parlamenti Evropian të mërkurën e përcaktoi Rusinë një shtet që sponsorizon terrorizmin, duke argumentuar se sulmet e saj ushtarake ndaj objektivave civile shkelin ligjin ndërkombëtar. Pamjet: AFP