Pas një jete të tërë të dedikuar artit dhe kulturës shqiptare, mjeshtri i kinemasë Dhimitër Anagnosti u përcoll për në banesën e fundit në fshatin e tij të lindjes, Vuno të Himarës, aty ku kishte lënë amanet të prehej. Vëllai i vogël, Odise Anagnosti, i cili ndau me publikun dhimbjen për humbjen e një njeriu që, siç tha ai, ishte më shumë se një vëlla. “Jam vëllai i vogël, ai ka qenë për mua mentori, jam përpjekur që kudo që kam qenë, ta nderoj! Jemi në një moment… kemi emocione, nuk është e lehtë të përcjellësh njeriun më të dashur. Ka qenë edhe babai im, jo vetëm shpirtërisht por edhe fizikisht e materialisht në ndihmën. Kam vetëm dy fjalë: të falënderoj bashkëfshatarët e mi që ishin prezent. Ai i donte shumë, se e donte vendin shumë. Do të jemi pranë tyre gjithmonë, siç i ka qëndruar ai.” Në këtë ceremoni lamtumire, u përcollën mesazhe nga prefekti i Vlorës, Plator Nesturi, kryetari i Bashkisë Himarë, Vangjel Tavo, si dhe nga aktori i madh Timo Flloko, të gjithë duke vlerësuar kontributin unik të Anagnostit për artin dhe shpirtin shqiptar.