“Independent”, në një artikull ku u sugjeron lexuesve destinacione për pushime verore, rendit Shqipërinë si vendin e duhur për aventura. Shumica e turistëve britanikë do të donin të eksploronin destinacione të reja dhe në zhvillim, në vend të destinacioneve të njohura, të mbipopulluara dhe të shtrenjta për pushime, shkruan Sarah Marshall, në artikullin e botuar në të përditshmen britanike. Për fat të mirë, ka mjaft mundësi për të zgjedhur nëse doni të kurseni para pa bërë kompromis me diellin apo cilësinë e përvojave. Qoftë duke shëtitur nëpër rrugët me kalldrëm, duke zbuluar majat e maleve apo duke notuar në ujërat e kaltra të shndritshme, Shqipëria ka një ngjashmëri të madhe me fqinjën e saj elegante përtej detit Adriatik, shkruan Marshall. Por krahasuar me Italinë, plazhet janë më të qeta, vendet e fshehura janë më të shumta dhe çmimet janë dukshëm më të lira. Mësoni rreth të kaluarës përmes arkitekturës osmane, fashiste dhe sovjetike të kryeqytetit, Tiranës, ecni në shtigjet që të çojnë në Parkun Kombëtar të Valbonës dhe relaksohuni në plazhet e arta të Rivierës Shqiptare. Udhëtimi tetëditor kushton 1,025 euro për person, duke përjashtuar fluturimet. “Independent” rendit vendet më të mira për t’u vizituar në vitin 2025, për pushime të përballueshme: 1. Vendi më i mirë për aventura: Shqipëria 2. Vendi më i mirë për plazhet: El Gouna, Egjipt 3. Vendi më i mirë për familjet: Galicia, Spanjë 4. Vendi më i mirë për ski: Voss, Norvegji 5. Vendi më i mirë për natyrën: Bosnjë-Hercegovina