3 milionë e 713 mijë e 761 shtetas shqiptarë, brenda dhe jashtë vendit, kanë të drejtë të votojnë në zgjedhjet parlamentare të 11 Majit. Ministria e Brendshme publikoi këtë të mërkurë listën përfundimtare të zgjedhësve për parlamentaret e 11 majit. Nga të dhënat e gjeneruara nga Drejtoria e Përgjithshme e Gjendjes Civile nga mbi 3.7 milionë shqiptarë me të drejtë vote, 114 mijë e 642 janë zgjedhës që votojnë për herë të parë. Ndërkohë, për herë të parë në historinë e zgjedhjeve parlamentare në vend, listat zgjedhore përfshijnë jo vetëm zgjedhësit që jetojnë brenda vendit, por dhe shqiptarët që jetojnë jashtë vendit. Ministria e Brendshme sqaron se procesi i hartimit të listës përfundimtare të zgjedhësve është kryer nën mbikëqyrjen e auditëve të KQZ-së, duke kaluar në disa faza, në zbatim të dekretit të Presidentit, përmes publikimeve të 3 ekstrakteve të përbërësve zgjedhore. Gjithashtu, sipas Ministrisë së Brendshme, më 11 Maj në të gjithë vendin do të jenë të hapura nga ora 07.00 e mëngjesit deri në orën 19.00 të mbrëmjes 5225 qendra votimi.