Ish-presidenti amerikan Donald Trump ka sugjeruar se do t’i bëjë një falje presidenciale atyre që janë dënuar në sulmet e Kongresit nëse do të zgjidhej sërish në 2024-ën. “Nëse garoj dhe fitoj, do t’i trajtojmë njerëzit e 6 janarit në mënyrë të drejtë. Dhe nëse duhet edhe falje presidenciale, do ta bëjmë edhe atë, sepse po trajtohen padrejtësisht.” – tha Trump në mitingun e tij në Conroe, Texas. Qindra mbështetës të Trump rrethuan Kongresin e SHBA-së, në Uashington në 6 janar në një përpjekje për të bllokuar certifikimin e Presidentit Joe Biden, në zgjedhjet e nëntorit 2020. Më shume se 700 persona janë arrestuar si pjesë e investigimeve në trazirat që lanë pesë të vdekur dhe vendin në turbullirë. Ish-presidenti është akuzuar se ka nxitur dhunën ndaj Kongresit me një fjalim të zjarrtë duke pretenduar se zgjedhjet ishin një mashtrim, pohime që nuk janë vërtetuar kurrë nga shtetet në fjalë, Departamenti i Drejtësisë apo gjykatat amerikane. Një komitet i përzgjedhur i Dhomës së Përfaqësuesve është gjithashtu në mes të hetimit se si ndodhi sulmi dhe nëse Trump dhe anëtarët e rrethit të tij kishin një rol në inkurajimin e tij.