Shtetasja amerikane Tracy Shannon Lyn, prej katër vitesh banore e Tivarit në Mal të Zi, denoncoi në policinë vendase rrëmbimin e vajzës së saj të mitur, Zynlee Ryan nga i ati, Thomas Hollenbeck. Media malazeze citojnë Lyn të ketë deklaruar se ish bashkëshorti, ka kaluar së bashku me vogëlushen 6 vjecare kufirin me Shqipërinë. Të njëjtat raporte tregojnë se Shannon është njoftuar përmes Ambasadës Amerikane në Podgoricë se Hollenbeck ka kërkuar pasaportë për fëmijën në Ambasadën Amerikane në Tiranë. Sakaq, bëhet e ditur se edhe Interpoli është informuar për rrëmbimin e fëmijës. Lyn i tha portalit Primorski se ende janë duke vazhduar në Malin e Zi procedurat gjyqësore lidhur me kujdestarinë e vajzës, ndërsa gjykata ende nuk ka dalë me një vendim përfundimtar. Vitin e kaluar, në shtator, gjykata e lejoi Tomasin ta takonte të bijën dy herë në javë, e sipas shtetases amerikane, këtë të drejtë ai kishte nisur ta përdorte vetëm në qershor të këtij viti. “Ka ndodhur që ai është vonuar për ta kthyer vajzën, por justifikohej me arsye objective si ngecje në trafik. Por mbrëmë nuk e solli, dhe kur unë tentoja t`i telefonja, celulari i tij rezultonte i fikur”, është shprehur Lyn, e cila pretendon se ish i shoqi ishte dënuar për disa krime.