Rusia po zhvillon stërvitje “të paprecedente” detare në Detin e Zi, duke rritur edhe më shumë frikën për pushtimin e Ukrainës. Stërvitjet, që janë planifikuar të zgjasin deri më 19 shkurt, kanë ndërprerë korsitë e transportit detar, që janë jetike për eksportet e Ukrainës. Sipas Shteteve të Bashkuara, Rusia gjithashtu ka grumbulluar rreth 130,000 trupa në kufijtë lindorë dhe veriorë të Ukrainës dhe mund të sulmojë në çdo moment - gjë të cilën Moska e mohon. Por, edhe pa pushtim, bllokada e rrugëve detare të Ukrainës mund ta shkatërrojnë vendin ekonomikisht, thote REL. Ministra e jashtme ukrainase lëshoi së fundi një ankesë zyrtare mbi planet ruse për të bllokuar pjesërisht Detin e Zi dhe Detin Azov nën petkun e gjoja stërvitjeve ushtarake. Sipas Kievit, shkalla e paprecedentë e manovrave detare ruse, “e bën lundrimin në të dy këto dete, praktikisht të pamundur”. Zyrtarët ukrainas pretendojnë se kjo lëvizje është pjesë e një “lufte hibride” të Moskës kundër vendit te saj fqinj, dhe e akuzojnë se ka shkelur hapur ligjet ndërkombëtare, përfshirë këtu kartën e OKB-së, rezolutat e Asamblesë së Përgjithshme të Kombeve të Bashkuara dhe konventën mbi ligjin e detit.