Policia e shtetit në 24 orëtë e fundit ka ushtruar kontrolle të intensifikuara, për të parandaluar dhe goditur kultivimin e bimëve narkotike dhe krimet e tjera në çdo formë të shfaqjes së tyre, si dhe për të vënë në pranga shtetasit e shpallur në kërkim. gjatë këtyre kontrolleve një 40-vjeçar që qarkullonte në kryeqytet, i armatosur me pistoletë, u arrestua. Rreth 32 200 euro të padeklaruara u sekuestruan në pikën kufitare të Morinës dhe në Portin e Durrësit, si dhe u vunë në hetim 2 shtetasit që tentuan t’i futnin këto para, në vendin tonë. 3 shtetas të shpallur në kërkim, të dënuar për krime në fushat e narkotikëve, transportimit ilegal të emigrantëve dhe falsifikimit, u ndaluan nga Policia, në Tiranë dhe në Durrës. Në Devoll u proceduan penalisht 2 shtetas të cilët u kapën teksa transportonin me kamionçinë, një sasi lënde drusore (gështenjë), të prerë në kundërshtim me ligjin. Në Bulqizë u vu në pranga një 62-vjeçar, pasi duke inskenuar një rast vjedhjeje në minierën ku punonte, dyshohet se ka konsumuar veprën penale “Kallëzimi i rremë”.