Parlamenti Europian miratoi ndryshimet në ligjet për azilin dhe migracionin që do të forcojnë mbrojtjen e kufijve të 27 vendeve, edhe pse kjo është kundërshtuar nga organizatat që mbrojnë të drejtat e njeriut. Votimi i së mërkurës, i cili tani pritet të vuloset nga vendet anëtare, i jep fund tetë viteve bllokim mbi përpjekjet e vazhdueshme për të forcuar menaxhimin e kufijve dhe proceset e azilit në bllokun 27-anëtarësh. Roberta Metsola, presidentja e Parlamentit Evropian, shkroi në platformën X se kjo ishte një ditë historike dhe se është ofruar një kuadër i fortë legjislativ për mënyrën se si do të trajtohet migracioni dhe azili në BE. Megjithatë, tensionet në fillimin e votimit nuk munguan. Procedura u ndërpre nga protestues të veshur me bluza të bardha, të cilët u bërtisnin eurodeputetëve se “Ky pakt vret!”. Ata hodhën avionë letre që mbanin koordinatat e anijeve të mbytura dhe refugjatëve që kanë vdekur në kufijtë e jashtëm të BE-së. Ndryshimet në ligjin e azilit parashikojnë sisteme të reja me kontrolle më të ashpra, pas të cilave do të kthehen menjëherë në vendet e tyre njerëzit që nuk kualifikohen për mbrojtje. Midis atyre që votuan kundër ishin partitë e ekstremit të djathtë francez dhe spanjoll. Pamjet: AFP