Presidenti rus Vladimir Putin i dërgoi një telegram urimi Mojtaba Khameneit për emërimin e tij si Udhëheqës Suprem i Iranit, tha të hënën Kremlini. "Tani, kur Irani po përballet me agresion të armatosur, puna juaj në këtë detyrë të lartë padyshim do të kërkojë guxim dhe përkushtim të madh. Jam i bindur se ju do të vazhdoni me nder punën e babait tuaj dhe do të bashkoni popullin iranian përballë sprovave të rënda", thuhej në një deklaratë e Kremlinit. Sipas deklaratës, Putin përsëriti mbështetjen e Moskës për Teheranin, duke thënë se Rusia do të mbetet një partner i besueshëm për vendin. "Nga ana ime, do të doja të konfirmoja mbështetjen tonë të palëkundur për Teheranin dhe solidaritetin me miqtë tanë iranianë. Rusia ka qenë dhe do të mbetet një partner i besueshëm i Republikës Islamike. Ju uroj suksese në zgjidhjen e detyrave të vështira që keni përpara, si dhe shëndet të mirë dhe forcë shpirtërore", thuhej në deklaratë. Mojtaba Khamenei, 56 vjeç, u bë Udhëheqësi i tretë Suprem i Iranit në histori. Presidenti iranian Masoud Pezeshkian e cilësoi emërimin e tij si një hap drejt forcimit të unitetit kombëtar. Udhëheqësi suprem i mëparshëm, Ajatollahu Ali Khamenei, e kishte mbajtur këtë pozicion për 37 vjet. Një sulm ajror i përbashkët i SHBA-së dhe Izraelit, më 28 shkurt goditi vendin ku ai ndodhej në Teheran, duke e vrarë atë. Ai ishte 86 vjeç.