NATO filloi stërvitjet e saj të përvitshme në Arktik të hënën, këtë herë duke i kushtuar më shumë rëndësi rolit të civilëve në mbështetjen e ushtrisë, në një kohë tensionesh të larta për shkak të përpjekjeve të Presidentit të SHBA-së Trump për të marrë Grenlandën nga Danimarka, anëtare tjetër e NATO-s. Stërvitjet, të quajtura Përgjigje e Ftohtë, përqendrohen në mbrojtjen e aleancës në Arktikun Evropian, ku anëtarët e NATO-s, Norvegjia dhe Finlanda, ndajnë një kufi me Rusinë, dhe do të zhvillohen këtë herë nga 9 deri më 19 mars. Stërvitja tani është bërë pjesë e Arctic Sentry, misionit të NATO-s për të forcuar praninë e saj në rajonin polar që nisi për të ulur tensionet me Trumpin mbi Grenlandën. Trump këmbëngul se SHBA-të kanë nevojë për Grenlandën për të shmangur kërcënimet nga interesat ruse dhe kineze në Arktik, dhe se Danimarka nuk mund të garantojë sigurinë e saj. Qeveritë e të dy shteteve, Danimarkës dhe Grenlandës, thonë se ishulli nuk është në shitje. Këtë vit, rreth 25,000 trupa nga rreth 14 vende, përfshirë SHBA-në dhe Danimarkën, marrin pjesë në Përgjigjen e Ftohtë, që do të zhvillohet kryesisht në të gjithë Norvegjinë veriore dhe Finlandë. ShBA-të pritet të kenë rreth 4,000 trupa të pranishme. Përpara stërvitjes, ushtria amerikane tërhoqi një skuadrilje avionësh luftarakë F-35 nga stërvitja. Ajo nuk pranoi të thoshte nëse lufta në Lindjen e Mesme luajti ndonjë rol në këtë vendim. "Ushtria amerikane është një forcë e vendosur globalisht dhe nuk është anormale që forcat të ricaktohen ose të rialokohen në mënyrë dinamike për një mori arsyesh", tha një zëdhënës i Marinës Amerikane.