Katër persona u plagosën në një atentat me armë zjarri që ndodhi mbrëmjen e së enjtes në Tiranë. Ngjarja u shënua në zonën e Lundrës, në periferi të kryeqytetit. Dy prej të plagosurve janë të mitur, të moshave rreth 11 dhe 17 vjeç. Po ashtu të plagosur mbetën edhe dy shtetasit me iniciale K. M., 19 vjeç, dhe A. S., 34 vjeç. Policia njoftoi se katër të plagosurit me armë zjarri ndodhen në spitalin e Traumës, ku dy të miturit mësohet se janë në gjendje të rëndë shëndetësore. Nga informacionet e dhëna, të plagosurit janë familjarë të pronarit të një kompanie sigurimi në Tiranë. Ata u qëlluan me breshëri plumbash teksa ishin duke udhëtuar me makinë. Pas hapjes së zjarrit, autorët u larguan nga vendngjarja. Atentatorët më pas kanë djegur automjetin e përdorur në zonën e Lundrës, në një përpjekje për të humbur gjurmët. Uniformat blu të kryeqytetit kanë ngritur pika kontrolli në të gjithë zonën dhe në pikat kyce të Tiranës për kapjen e autorëve. Ndërkohë që po punohet për zbardhjen e rrethanave të atentatit.