Një biznes në Durrës, i cili funksiononte brenda të gjitha rregullave, prej muajsh shantazhohej me mbyllje nëse nuk paguante një gjobë prej 20 mijë eurosh. Shantazhuesi ishte vetë shefi i sektorit të narkotikëve të policisë Durrës kryekomisar Gazmir Preçi. Nën petkun e ligjit, por me qëllime gjobvënësi ai ushtroi disa kontrolle në clabin që ofronte dhe striptizëm dhe kur gjithçka ishte ligjore doli në temë duke kërkuar haraçin e tij prej 20 mijë eurosh. Pronari I biznesit denoncoi rastin dhe kryekomisari u arrestua në flagrancë teksa po zhvillonte një takim me pronarin e biznesit në zonën e kinostudios në Tiranë ku do të merrte rryshfetin prej 10 mijë eurosh. Agjencia e Mbikëqyrjes Policore pas hetimeve intensive të kryera në bashkëpunim (SPAK) kryen arrestimin në flagrancë të kryekomisarit për veprat penale "Shpërdorim detyre" dhe "Korrupsion pasiv i personave që ushtrojnë funksione publike". Në përfundim të veprimeve janë sekuestruar në cilësinë e provës materiale vlera monetare prej 10 mijë euro, dokumente që lidhen me ngjarjen dhe dy aparate telefonikë celularë. Hetimet vijojnë për dokumentimin e plotë me prova ligjore, si dhe identifikimin e punonjësve të tjerë të mundshëm të përfshirë në këtë ngjarje.