Dikur njeriu më i pasur i Rusisë, Mikhail Khodorkovsky, kaloi dhjetë vjet në burg në Siberi për shkak të përplasjes me Vladimir Putinin, ndërsa aktuali8sht jeton në Londër. Ish manjati i naftës mbetet sidoqoftë një nga opozitarët më të zëshëm të Kremlinit. Khodorkovsky mendon se Putin ka arsye të forta për të menduar seriozisht uljen në tryezën e negocviatave për fundin e luftës. “Problemet ekonomike dhe ato të rekrutimit po shtohen. Edhe territoret e pushtuara në Ukrainë po kthehen në barrë financiare. Vetëm për rindërtimin duhen të paktën 200-300 miliardë dollarë, pa llogaritur koston e mbajtjes së miliona banorëve që kanë mbetur atje, kryesisht të moshuar dhe njerëz në nevojë”, është shprehur ai. Ish bosi i Jukos-it paralajmëron se Putini mund të përballet me trazira sociale nëse përpiqet të konsolidojë kontrollin mbi Donbasin. “Ka marrë mbi vete një problem shumë më të madh se Çeçenia. Ukrainasit janë mësuar të kërkojnë të drejtat e tyre, ndryshe nga rusët që i kanë humbur këto reflekse”, shton ai. Për marrëdhënien e Kremlinit me Donald Trump, Khodorkovsky është i qartë: “Putin e kupton që Trump është presidenti më i favorshëm që mund t’i bjerë përballë. Ky është momenti më i mirë për të ruajtur atë që ka pushtuar dhe për të fituar legjitimitet ndërkombëtar. Por Putini është edhe i kujdesshëm, i frikësohet të kalojë ndonjë vijë të kuqe përballë Trumpit”. Në lidhje me opinionin publik rus, ai thekson se vetëm 30% mbështesin realisht luftën, kryesisht të moshuar. Pjesa tjetër është e painteresuar ose kundër, por e frikësuar nga pasojat e një humbjeje. Sa i përket ushtrisë, Kremlini po mbush radhët me të rinj të detyruar të firmosin si “vullnetarë”. “Është një mashtrim i rrezikshëm për qeverinë. Putini mund ta vazhdojë luftën edhe për ca kohë, por gjithnjë e më me vështirësi”, thotë Khodorkovsky.