CNN thotë se Irani ka përdorur një lloj të ri rakete balistike gjatë sulmeve të fundit ndaj Izraelit. Sipas agjencisë shtetërore iraniane Fars, raketa e quajtur "Haj Qassem" është përdorur për të goditur Izraelin gjatë valës së sulmeve të natës së kaluar. Ministri iranian i Mbrojtjes, gjenerali Aziz Nasirzadeh, kishte deklaruar që në fillim të majit në televizionin shtetëror iranian se kjo raketë e re është në gjendje të kapërcejë sistemet mbrojtëse si të ushtrisë amerikane, të vendosura në Izrael, si dhe sistemet Patriot apo të tjera që përdoren nga vetë Izraeli. Sipas një tjetër agjencie shtetërore iraniane, Tasnim, Irani e prezantoi këtë raketë në fillim të muajit të kaluar, duke deklaruar se ajo funksionon me karburant të ngurtë, ka një rreze veprimi prej 1.400 kilometrash dhe është e pajisur me një kokë lufte manovruese, e aftë të depërtojë në sistemet e mbrojtjes raketore.