Ambasadori amerikan në Kosovë, Jeff Hovenier, deklaroi se kosovarët qëndrojnë në krah të Ukrainës përballë kërcënimeve që Rusia po i bën shtetit europiano-lindor. Ai postoi një mesazh në faqen zyrtare të ambasadës së ShBA-së në Prishtinë ku i referohej provokimeve ruse në Ukrainë. “Kosovarët qëndrojnë me Ukrainën. Kërcënimi i Rusisë ndaj saj është kërcënim ndaj vlerave demokratike çdokund. Kjo vlen për parimet themelore, jo të negociueshme, duke përfshirë të drejtën e qenësishme të qytetarëve për të përcaktuar të ardhmen e vendit të tyre”, shkruan ambasadori. Në kohën e rritjes së tensioneve, Prishtina zyrtare ka përcjellë hapur mbështetje për Kievin. Ministria e Mbrojtjes e Kosovës ka shprehur gatishmërinë që komponentë të caktuar të Forcës së Sigurisë së Kosovës t’i vendosë në dispozicion të SHBA-së, në rast se i kërkohet për ndonjë mision. Vitin e kaluar, Forca e Sigurisë e Kosovës ka qenë për herë të parë pjesë e misionit paqeruajtës ndërkombëtar në Kuvajt, së bashku me trupat amerikane. Ambasadori Hovenier tha se Uashingtoni po vazhdon të ndërtojë një koalicion ndërkombëtar të partnerëve në Evropë dhe gjetkë, për t’iu kundërvënë kërcënimit rus.