Duke sfiduar me shkathtësi të birin e saj me një shkop bambuje, Menakshi Amma nuk do t’ia dijë për moshën e saj duke treguar aftësitë në ‘kalari’, arti marcial më i vjetër i Indisë. Gjyshja e familjes nga Kerala, në jug të Indisë, ka qenë një nga motivueset e mëdha të ringjalljes së praktikës së lashtë luftarake kalari-paiatu, duke nxitur vajzat të bëhen pjesë e saj. "Kam nisur kalari që kur kam qenë shtatë vjeçe. Tani jam 75. Unë praktikoj, mësoj dhe u mësoj të tjerëve," thotë matriarkia e shkollës Kalari Sangham, të themeluar nga bashkëshorti i saj tashmë i ndjerë. "Kur shikon gazetat, ka lajme vetëm për dhunën ndaj grave. Nëse gratë mësojnë këtë art marcial ato do të ndjehen të forta fizikisht e mendërisht.” “Ato do të kenë besim te vetja për të punuar apo udhëtuar të pashoqëruara”. Kalari ka elemente tradicionale të kërcimit dhe të jogës, por përfshin dhe armatime si shpata, mburoja e shkopinj. Arti besohet se është rreth 3,000 vjeçar, dhe përmendet në shkrimet e lashta Hindu, duke mbetur i integruar në besimin fetar edhe sot. Kolonizatorët britanikë e ndaluan këtë praktikë në 1804 por ajo mbijetoi fshehurazi deri pas pavarësisë së Indisë në 1947.