Nuk vendosën maskat/ 426 qytetarë ndëshkohen në 24 orët e fundit, 1 milion lekë gjobë një lokali

Gjatë 24 orëve të fundit, 426 qytetarë janë ndëshkuar me masë administrative prej 3.000 lekësh, pasi nuk vendosën maskat mbrojtëse. Ndërkohë një subjekt që ushtronte aktivitet në kundërshtim me protokollet e sigurisë u gjobit me 1.000.000 lekë. “Strukturat e Policisë, krahas përmbushjes së detyrave funksionale për parandalimin, evidentimin dhe goditjen e paligjshmërisë, kanë vijuar kontrollet në terren në të gjithë vendin, për të monitoruar zbatimin e masës së re për parandalimin e përhapjes së COVID-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia. Si rezultat i këtyre kontrolleve, gjatë 24 orëve të fundit, në të gjithë vendin, Patrullat e Përgjithshme dhe ato të Policisë Rrugore kanë evidentuar dhe ndëshkuar me masën administrative 3.000 lekë secili, 426 qytetarë që janë konstatuar duke lëvizur pa maskat mbrojtëse”, shkruhet në një njoftim të Policisë së Shtetit. Më tej, njoftimi vazhdon: “Gjatë kontrolleve janë shoqëruar në ambientet e Policisë në të gjithë vendin, 6 shtetas që nuk kanë pranuar t’i tregojnë punonjësve të Policisë dokumentin e identifikimit, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë. Gjatë kontrolleve të ushtruara në subjekte të ndryshme, shërbimet e Policisë kanë evidentuar një lokal në të cilin ushtrohej aktiviteti në kundërshtim me protokollet e sigurisë. Për këtë subjekt u vendos masa administrative 1.000.000 lekë”.