Ministria e Shëndetësisë dhe Mbrojtjes Sociale dhe kompania farmaceutike Rejsi Farma në fund të vitit të kaluar duket se janë përfshirë në një procedurë prokurimi publik, për të cilin ka dyshime të forta për fitues të paracaktuar. Nga buxheti i shtetit janë hedhur 8.5 milionë euro për vetëm 4 medikamente që u shërbejnë një numri shumë të vogël pacientësh. Këto tendera janë fituar nga kompania Rejsi Farma pa garë, pasi ka qenë e vetmja kompani pa konkurentë të tjerë. Tenderi ishte i ndarë në 15 lote për blerjen e barnave me rëndësi të veçantë terapeutike dhe inovatore, sipas ministrisë, me vlerë 9,3 milionë euro pa TVSH. Vetëm 4 lotet e fituara nga Rejsi Farma mbajnë vlerën 8.5 milionë euro . Për 11 lotet e tjera buxheti i vënë në dispozicion nga ministria për blerjen e barnave që kanë nevojë pavionet e QSUT-së është rreth 800 mijë euro pa TVSH. Kompania Rejsi Farma është e vetmja që ka patentën nga kompanitë prodhuese të këtyre 4 medikamenteve për t'i sjellë në Republikën e Shqipërisë, duke e bërë atë fituese të paracaktuar.