Fatmir Toska, ankohet në emisionin Fiks Fare se është mashtruar nga kreu i Shoqatës së të Përndjekurve në Lushnje, z.Pëllumb Gega, i mori 600 mijë lekë nga paratë e dëmshpërblimit . Toska tregon se në vitin 2019 përfitoi një shumë prej 650 mijë lekë të dëmshpërblim si familje të përndjekurish. Ditën që shkoi t’i merrte në bankë u shoqërua nga kreu i shoqates z. Gega i cili nga e gjithë shuma i dha vetëm 50 mijë lekë. Pjesën tjetër i tha se do ua kthente mbrapsht atyre nga Tirana që kishin bërë të mundur miratimin e këtij dëmshpërblimi. Pasi kuptoi se ishte mashtruar Fatmiri bën një kallzim ndaj kreut të shoqatës. Dy ditë pas kallzimit, Z. Gega fton kallzuesin të nënshkruajnë një deklaratë noteriale ku do i kthente të gjitha lekët. Ndërkohë që deklarata përpilohej i jep shumën prej 250 mijë lekësh. Fatmiri me idenë se po firmoste deklaratë që do t'i shlyheshin të gjitha lekët mashtrohet sërish, pasi firmos një deklaratë ku thuhet se kreu i shoqatës nuk ka asnjë detyrim karshi tij dhe se janë shlyer. Më pas zhvillohet gjyqi, të cilin kallzuesi e fiton dhe kreu i shoqatës shpallet fajtor dhe mashtrues. Por edhe pse me këtë vendim gjykate si mashtrues ai ende është sot e kësaj dite në krye të Shoqatës së të Përndjekurve në Lushnje.