Në një kohë kur pandemia në vend ka arritur në pikë kritike dhe ku infektimet prej javësh kalojnë mbi 1000 raste në ditë, shumë qytetarë vijojnë të neglizhojnë mbajtjen e maskës në rrugë. Vetëm në 24 orët e fundit patrullat e policisë në të gjithë vendin gjatë kontrolleve të ushtruara kanë evidentuar dhe ndëshkuar me masë administrative 3.000 lekë, 829 shtetas që janë konstatuar pa maskat mbrojtëse. Ndërsa 155 shtetas të tjerë u konstatuan dhe u ndëshkuan nga Shërbimet e Policisë Rrugore me të njëjtën masë administrativepasi udhëtonin në mjete private me persona me të cilët nuk kishin lidhje familjare apo në mjetet e transportit publik, pa vendosur maskat mbrojtëse. Gjatë kontrolleve, shërbimet e Policisë kanë konstatuar 1 subjekt që ushtronte aktivitetin në kundërshtim me protokollet e sigurisë. Për administratorin e këtij subjekti është vendosur masa administrative 1.000.000 lekë. në të gjithë vendin janë ndëshkuar me masë administrative 10.000 lekë, 12 shtetas që janë konstatuar duke lëvizur në këmbë pas orës 20:00. Në zbatim të masave anticovid, Policia e Shtetit apelon për të gjithë qytetarët dhe drejtuesit e mjeteve që të respektojnë orën policore, të vendosin maskën dhe të ruajnë distancimin social, ndërsa subjektet tregtare, lokalet dhe restorantet të respektojnë protokollet e sigurisë dhe orarin e mbylljes, me qëllim parandalimin e përhapjes së COVID-19.