“Flasim shqip por nuk kuptohemi” – Si i shpjegojnë gjuhëtarët ndryshimet mes Shqipërisë e Kosovës

“Është arrestuar i dyshuari mashkull K/Shqiptar, pasi që i njëjti pas një mosmarrëveshje e ka sulmuar fizikisht viktimën mashkull K/Shqiptar të cilit i ka shkaktuar lëndime trupore. Viktima është dërguar në QKUK për trajtim mjekësor ndërsa i dyshuari pas intervistimit me vendim të prokurorit është dërguar në mbajtje.” Ky është paragrafi i parë i një komunikate zyrtare të Policisë në Prishtinë, e cila është e vështirë të kuptohet nga një shqiptar i Shqipërisë. E ndonëse gjuha shqipe po deformohet nga vetë shqipfolësit janë politikanët të parët e më pas institucionet në të dy shtetet, Shqipëri dhe Kosovë, të cilët po shkelin me dy këmbë mbi atë që me shumë përpjekje ndër vite u arrit në kongresin e drejtshkrimit të vitit 1972,përdorimin e gjuhës standarde shqipe nën moton “Një gjuhë një komb”. Gjuha standarde është mbi dialektet bazuar në drejtshkrim, morfologji dhe sintaksë të saktë. Fjalia fillon me kryefjalë,kallëzues për të vijuar me kundrinorë apo përcaktorë dhe këto rregulla kurrsesi nuk mund të shkelen. Gjuhëtarët e shprehin keqardhjen për atë që po ndodh edhe kur nuk duan ta pranojnë apo shfajësojnë për gabimet. E kundërta e asaj që ndodhi me keqpërdorimin e gjuhës standarde nga politikanët e Shqipërisë dhe Kosovës ndodh në Maqedoni, ku nuk resht përpjekja për një gjuhë të pastër shqipe. Përpjekjet për të përdorur gjuhën standarde në dy shtetet shqiptare kanë nisur në Kosovë,shprehet Memisha pavarësisht trysnisë politike të asaj kohe. Gjuhëtarët i bëjnë thirrje dy qeverive të ndërmarrin iniciativa të përbashkëta për të ruajtur gjuhën shqipe nga deformimet sidomos në shkolla dhe institucione sa nuk është vonë.