Është ekstraduar nga Kroacia drejt vendit tonë 28-vjeçari Xhino Aliço, i dënuar për “Vrasje me dashje”, mbetur në tenativë. Në njoftimin zyrtar të policisë, thuhet se Xhino Aliço është dënuar me 13 vite e 6 muaj burg dhe se Gjykata e Lushnjes i ka caktuar masën e arrestit në burg. 28-vjeçari Aliço në vitin 2016 së bashku me babain e tij, Arjan Aliço kanë tentuar të vrasin Julian Sulën duke e qëlluar mbi 10 herë me thikë. Asokohe, policia pati vënë në pranga vetëm të atin e Xhino Aliços, Arjan Aliçon, i dënuar më parë për vrasje. Arjan Aliço, është arrestuar edhe në vitin 2009 pasi Gjykata e Krimeve të Rënda në vitin 2006 kishte nxjerrë urdhër arresti për të, si anëtar i “Bandës së Lushnjes”. Ai u akuzua për “pjesëmarrje në organizate kriminale”, “kryerje e veprave penale nga organizata kriminale”, “vjedhje me dhunë” dhe “dhunim të varreve”.