Mëngjesi i kësaj të enjte do t’i jap fund pritjes. Edi Rama do të hapë zarfin me qeverinë e re dhe do t’i jap fund aludimeve, pritshmërive dhe spinimeve për emra të mundshëm për çdo portofol ministror. Lista e mbajtur “Top Secret” për javë të tëra, do të bëhet publike para 400 socialistëve në Asamblenë Kombëtare. Kabineti i katërt pritet të sjellë emra të rinj, surpriza dhe pse jo tronditje politike. Rama ka lënë të kuptohet se asnjë ministër nuk është i sigurt. Në lojë është skuadra që do të drejtojë vendin drejt objektivit madhor – anëtarësimit në Bashkimin Europian deri në vitin 2030. Në prapaskenë, kryeministri ka zhvilluar takime maratonë dhe telefonata intensive, ku sigurisht parakilimet e kujtdo që hynte në kryeministri është parë ndoshta si një shtrirje dore e kryeministrit për ta pasur në qeveri. Por çfarë fshihet pas zarfeve të Ramës? Çfarë prolfili do të kenë ministrat e rinj? A do të arrijë Edi Rama t’i kënaq të gjithë ata që i dhanë fitoren më të madhe në këto 12 vitë socialistëve? Përgjigjet nesër do të jenë mbi tavolinë dhe do të shpallen nga Edi Rama.