Më 8 gusht, një breshëri plumbash goditi disa mjete të parkuara në hotelin “Voloreka” në Tushemisht duke shkaktuar dëme materiale. Në videon e mëposhtme, të siguruar nga Top Channel shihet një prej atentatorëve. Nga sulmi në fjalë, 6 makina luksoze përfunduan të dëmtuara. Kujtojmë se ky nuk ishte atentati i parë, pasi më 1 gusht u qëlluan 3 plumba në drejtim të hotelit, por kjo ngjarje nuk u raportua më herët. Shkak i sulmit u bë një grindje e ndodhur një vit më parë mes djalit të pronarit dhe 37-vjeçarit Mariglen Topuzi, ndërsa disa karikatorë kallashnikovi u zbrazën në drejtim të parkingut të automjeteve dhe ndërtesës. Pas ngjarjes së rëndë policia u vu në lëvizje dhe arriti të hedhë dritë mbi ngjarjen duke siguruar si prova 1 mjet motor tip “Suzuki”, pa targë, 2 skafandra të përdorura nga autorët, ku janë fiksuar prova biologjike dhe balistike të tyre, fishekë luftarakë, si edhe pamje filmike të filmuara nga kamerat e sigurisë.