Gjatë 24 orëve të fundit, Drejtoria e Forcës së Posaçme Operacionale ka finalizuar dy faza të tjera të operacionit policor të koduar “Operacionalja”, konkretisht fazat 78 dhe 79. Si rezultat i këtyre operacioneve, në Tiranë u kapën dhe u vunë në pranga dy shtetas, me iniciale R. B. dhe G. H., banues në kryeqytet. Sipas Policisë, dy të arrestuarit ishin shpallur në kërkim ndërkombëtar, pasi autoritetet e Kosovës kishin lëshuar urdhër arresti ndaj tyre për veprën penale “Pjesëmarrje ose organizim i grupit të strukturuar kriminal”, në fushën e trafikimit të qenieve njerëzore. Të ndaluarit u arrestuan me qëllim ekstradimin drejt Kosovës, ndërsa vijon puna për përfundimin e procedurave ligjore për dorëzimin e tyre.