Mbretëria e Bashkuar miratoi përdorimin e bazave të saj nga Shtetet e Bashkuara te Amerikes për operacione kundër objektivave iraniane në Ngushticën e Hormuzit. Qeveria në Dauning Street kishte autorizuar më herët forcat amerikane të përdorin bazat britanike për operacione që synojnë të pengojnë Iranin të lëshojë raketa që do të rrezikonin interesa apo jetë britanike. Gjatë mbledhjes së qeverisë, ministrat e kabinetit Starmer ranë dakord që përdorimi i bazave britanike nga SHBA tani mund të zgjerohet edhe për mbrojtjen e anijeve në Ngushticën e Hormuzit. Megjithatë, Mbretëria e Bashkuar nuk do të përfshihet drejtpërdrejt në sulme. Një zëdhënës i Doëning Street deklaroi se ministrat ranë dakord sot që bazat mund të përdoren për “operacione mbrojtëse amerikane”, të cilat synojnë të godasin “kapacitetet që përdoren për të sulmuar anijet në Ngushticën e Hormuzit”. Ata shtuan gjithashtu se “ministrat theksuan nevojën për një ulje urgjente të tensioneve dhe një zgjidhje të shpejtë të luftës”. Vendimi nga Londra erdhi pasi presidenti amerikan, Donald Trump, sulmoi ashpër aleancën euroatlantike, që nuk ndërhyn për zhbllokimin e ngushticës së Hormuzit, gjë që do të çonte në stabilizim të çmimit të karburanteve.