Një tjetër rast i kultivimit të bimëve narkotike është goditur nga policia e Kurbinit, ku dy persona janë vënë në pranga dhe një tjetër është shpallur në kërkim. Operacioni policor i koduar "Trinomi" vuri në pranga Dean Gegën 28 vjeç si dhe Xhovan Ndrecën, 53 vjeç, me detyrë faturist pranë OSHEE Kurbin. Nga ana tjetër, shtetasi Ylli Pali, 24 vjeç është shpallur në kërkim. Policia bëri me dije se këta shtetas në bashkëpunim me njëti tjetrin, katin e parë të një banese në Fushë Milot e kishin përshtatur si laborator që shërbente për kultivimin e bimëve narkotike, nëpërmjet ngrohjes me llamba, si dhe gjatë kontollit u gjet një sasi lënde narkotike. Gjithashtu, në këtë banesë u evidentua lidhje e paligjshme e energjisë elektrike, si dhe ndërtimi pa leje i një dhome shtesë. Policia sekuestroi 271 bimë të dyshuara narkotike cannabis sativa të kultivuara në vazo, 2 kilogramë e 500 gramë lëndë e dyshuar narkotike cannabis sativa, pajisje elektrike, llamba elektrike termale, lëndë ushqyese për kultivimin e bimëve narkotike etj. Materialet hetimore i kaluan Prokurorisë pranë Gjykatës së Shkallës së Parë Kurbin, për veprime të mëtejshme. Ndërkohë vijon puna nga ana e autoriteteve për identifikimin dhe kapjen e personave të tjerë të përfshirë në këtë veprimtari kriminale.