Pasi prokurori i dorëzoi kryeparlamentarit Niko Peleshi kërkesën për t’i hequr imunitetin zëvendëskryeministres Belinda Balluku, tashmë kuvendi do të duhet të vendoset në lëvizje për të marrë një vendim për këtë çështjen. Rregullorja e kuvendit parashikon se kryetari Peleshi duhet t’ia dërgojë kërkesën me dokumentet shoqëeuese menjëherë për shqyrtim këshillit për imunitetin dhe mandatet dhe vë në dijeni Ballukun. Kjo e fundit ka të drejtë të paraqesë në këshill me shkrim ose me gojë shpjegimet e saj për këtë çështje, ose të përfaqësohet nga avokatët mbrojtës. Këshilli do të mblidhet të premte, më 19 dhjetor. Pas shqyrtimit, brenda dy javësh këshilli harton një raport për në seancë plenare, në të cilin rekomandon rrëzimin ose miratimin e dhënies së autorizimit për caktimin e masës së sigurimit të arrestit në burg ose në shtëpi. Raporti i Këshillit u shpërndahet deputetëve.