SPAK këmbëngul se ka gjetur prova të reja tek të cilat është bazuar për të ashpërsuar qëndrimin kundër zëvendës kryeministres dhe ministres Belinda Balluku. SPAK njoftoi zyrtarisht se i është drejtuar kuvendit me kërkesë për dhënie autorizimi për t’i hapur në këtë mënyrë rrugë arrestimit apo heqjes së lirisë së funksionares së lartë. Siç bëjnë me dije burime pranë Top Channel, SPAK përmend se për nevoja të hetimit kërkohet dhënia e autorizimit pa saktësuar se me çfarë mase po përgatitet SPAK ti drejtohet Gjykatës së Posaçme në rast se kjo kërkesë aprovohet. Nga ana tjetër në njoftimin zyrtar thuhet se kërkesa për heqje imuniteti të Belinda Balluku, lindur dhe banuese në Tiranë, e cila ushtron funksionet e deputetit, ministrit dhe zëvendëskryeministrit të Republikës së Shqipërisë, ndodh në kuadër të procedimit penal nr. 136 të vitit 2025. Dhe përpos dy episodeve të bëra publike më herët për të cilat është marrë e pandehur dhe që janë tuneli i Llogorasë dhe loti katër, SPAK ka renditur edhe gjashtë episode të reja në të cilat Balluku është person nën hetim. Që të shtata janë procedura të tjera prokurimi ku Belinda Balluku dyshohet se shkeli barazinë në tendera duke bashkëpunuar me zyrtarë të tjerë nën hetim. Këto tendera janë rakordimi i punimeve Sheshi Shqiponja-Lumi i Tiranës, Loti 1 dhe QMT, Ndërtimi i segmentit rrugor Sheshi Shqiponja-Bulevardi i Ri, Loti 2, Ndërtim i segmentit rrugor Sheshi Shqiponja-Bulevardi i Ri- Shkozë, Urat mbi lumin Tirana, Ndërtimi i Unazës së Jashtme Tiranë, Loti 4, Ndërtim i Unazës së Jashtme Tiranë, Loti 5, Loti 6 dhe Loti 7”. Kërkesa e prokurorit Dritan Preçi vjen pak përpara se në Gjykatën e Apelit pra këtë të mërkurë datë 18 dhjetor, të shqyrtohet apelimi i Belinda Ballukut që kërkon heqjen e masës personale atë të pezullimit nga detyra dhe ndalimit për të dalë jashtë vendit. Në fakt siç rezultoi Gjykata Kushtetuese e ktheu në detyrë Belinda Ballukun derisa të zgjidhet në themel mosmarrëveshja mes ekzekutivit dhe gjyqësorit. Dhe ndërsa i ngeli në fuqi masa që e ndalon për të dalë nga Shqipëria, me lëvizjen e SPAK për imunitetin Kryetari i Kuvendit Niko Peleshi ka njoftuar këshillin për mandatet dhe imunitetin, i cili sipas burimeve pritet të mblidhet në datën 19 dhjetor. Këshilli sipas ligjit përbëhet nga pesë deputetë socialist dhe po aq nga grupi parlamentar i PD. Zonja Balluku mund të jetë prezentë vetë në këshill ose të përfaqësohet me avokat dhe të pranishëm do jenë edhe prokurorët e posaçëm që parashtrojnë kërkesën për heqjen e imunitetit. Kurse ligji parashikon hartimin e raportit nga këshilli brenda dy javëve nga mbajtja e mbledhjes dhe më pas i kalon parlamentit për votim.