Zelanda e Re ka vendosur të fusë të gjithë shtetasit e saj në izolim të plotë, pasi një person i vetëm rezultoi pozitiv me koronavirus pas testimit. Ky ishte rasti i parë në vend pas gjashtë muajsh. Rasti u konfirmua në Auckland, ku izolimi i plotë do të zgjasë një javë. Po një javë do të qëndrojë në “lockdoën” dhe qyteti bregdetar Kormandel, në të cilin personi i infektuar kishte qenë për vizitë, ndërsa për pjesën tjetër të vendit, izolimi do të zgjasë vetëm tre ditë. Autoritetet thanë se po veprojnë duke marrë si të mirëqenë që rasti i ri është i infektuar me variantin Delta të koronavirusit. Vetëm 20 përqind e popullsisë në Zelandën e Re është vaksinuar plotësisht. “Ju siguroj se e kemi planifikuar këtë skenar. Izolimi i plotë që në fillim, ka funksionuar shumë mirë për ne në të kaluarën”, tha kryeministrja Jacinda Ardern.