Në 24 orët e fundit janë shuar 13 vatra zjarri nga 20 të evidentuara, mes tyre edhe zjarri në fushën e mbetjeve në qytetin e Vlorës. Ndërkohë vijojnë te jenë ende aktive zjarret në fshatin Zogaj, bashkia Tropojë, i cili është izoluar plotësisht në kufi me bashkinë Has dhe vijon aktive me intesitet të ulët në veri të lagjes Hajdarmataj. Sipas bilancit të Ministrisë së Mbrojtjes, po punohet për shuarjen e vatrës në fshatin Hoten, bashkia Vau Dejës. Zjarri ka intensitet të ulët dhe nuk paraqet rrezik për zonat e banuara. Zjarri në fshatin Mal-Shëngjin, bashkia Lezhë, i cili është aktiv prej disa ditësh pasditen e së hënës u përhap menjëherë duke vënë në rrezik bizneset dhe zonat e banuara. Megjithatë pas ndërhyrjes nga ajri është bërë e mundur shmangia e rrezikut për qytetarët. Vijon të jetë aktiv zjarri në fshatin Zavalinë, në Elbasan, ku janë angazhuar në aksion strukturat e pushtetit vendor të mbështetura nga Forcat e Armatosura. Puna po vijon edhe në dy vatra të tjera, në kodrat e ligenit të Viroit, në Gjirokastër dhe fshatin Lozhan, pjesë e bashkisë Maliq.