Japonia ka angazhuar 1,400 zjarrfikës dhe 100 trupoa të Forcës së Vetëmbrojtjes për të luftuar zjarret në pjesën veriore të vendit, me zjarret, që tani digjen për të pestën ditë radhazi, duke vazhduar të kërcënojnë një qytet bregdetar piktoresk. Sipërfaqja e përfshirë nga zjarret arriti në 1,373 hektarë mëngjesin e të dielës. Zjarret kërcënojnë lagjet rezidenciale të Otsuchi-t në Bregun e Paqësorit, një qytet që humbi gati një të dhjetën e popullsisë së tij në një nga fatkeqësitë më të këqija të Japonisë, tërmetin dhe cunamin e marsit 2011. Urdhra evakuimi janë në fuqi për 1,541 familje ose 3,233 banorë, afërsisht një e treta e popullsisë së Otsuchi-t. "Edhe pse Forcat e Vetëmbrojtjes po luftojnë zjarret nga qielli, me helikopterë, moti i thatë dhe erërat po ndihmojnë në zgjerimin e zjarreve", tha kryebashkiaku i Otsuchi-t, Kozo Hirano, në një konferencë për shtyp. Një banor i Otsuchi-t tha se ishte i shqetësuar për dëmet që mund të shkaktonte zjarri. "Një zjarr djeg gjithçka. Me një cunami, mund të të mbetet diçka pas shkatërrimit", tha Yoshinori Komatsu, 74 vjeç, ndërsa shikonte helikopterët e Forcave të Vetëmbrojtjes të hidhnin ujë mbi zjarret në distancë. Nuk pritet shi në rajon të paktën deri të martën, sipas Agjencisë Meteorologjike të Japonisë. Shkaku i zjarreve është ende i paqartë ndërkohë që autoritetet kanë nisur një hetim.