Zhvlerësimi i Euros po dëmton më së shumti bizneset eksportuese në vend, që të gjitha transaksionet i kryejnë përmes monedhës së përbashkët. Në të tilla kushte, shtatë shoqata të bizneseve prodhuese, eksportuese dhe ato të turizmit i janë drejtuar me një letër Guvernatorit të Bankës së Shqipërisë, Gent Sejko dhe Ministrisë së Financave. Shoqatat paralajmërojnë se rënia e euros në nivelet më të ulëta të ulëta historike rrezikon kthimi në një ekonomi të pastër importuese të ngjashme me atë të vitit 1992 nën efektet e “terapisë shock”. Shoqatat e biznesit pohojnë se ky zhvlerësim i monedhës euro, ka dëmtuar shumë rëndë industrinë prodhuese, eksportuese dhe turizmin vendase duke kërcënuar shumë subjekte drejt falimentimit. Bizneset kërkojnë nga Banka e Shqipërisë dhe Ministria e Financave një analizë të thelluar të shkaqeve të këtij fenomeni dhe ndërhyrjen me mekanizmat e nevojshëm për ta parandaluar atë. Brenda një viti, Euro është zhvlerësuar me gati 8 për qind përballë lekut. Sipas kursit zyrtar të këmbimit të Bankës së Shqipërisë, euro u këmbye me 111.39 lekë, në rënie me 0.42 pikë krahasuar me ditën e hënë dhe duke prekur një minimum të ri historik.