Krishtlindjet vijnë më herët në Karakas dhe kjo nuk ka të bëjë fare me temperaturën. Vendimi për të afruar festën e Krishtlindjes është marrë nga Nicolas Maduro, presidenti i Venezuelës, i cili ka zgjedhur të përsërisë një traditë që ka qenë në modë për disa vite. Udhëheqësi i vendit të Amerikës së Jugut e bëri njoftimin gjatë programit të tij televiziv "Con Maduro +", të transmetuar në televizionin shtetëror: Ai do t’i zhvendosë përsëri krishtlindjet nga 25 dhjetori më 1 tetor dhe sipas Maduros, kjo bëhet për të "mbrojtur të drejtën e popullit venezuelian për gëzim dhe lumturi". Në fakt, ky nuk është një vendim i ri dhe i padëgjuar. Që kur erdhi në pushtet në vitin 2013, pasuesi i Hugo Chavezit i ka zhvendosur festat disa herë sipas dëshirës. Maduro siguron se edhe këtë herë, afrimi i Krishtlindjes është thjesht mënyra e tij për t'i bërë "homazh" popullit, si të ishte një formë e thjeshtë falënderimi. Por realiteti duket disi ndryshe, të paktën duke gjykuar nga koha e vendimeve të caktuara. Dymbëdhjetë muaj më parë, për shembull, u mor vendimi për të shtyrë festat e Krishtlindjeve në fillim të tetorit me qëllimin specifik për të qetësuar shpirtrat. Karakasi dhe rrethinat e tij ishin një fuçi baruti, pas protestave të ashpra popullore të shkaktuara nga rezultatet e diskutueshme të zgjedhjeve presidenciale të 28 korrikut 2024. Megjithatë, këtë vit, vendimi duket se është ndikuar nga tensionet e fundit me Shtetet e Bashkuara, të cilat maduro shpreson ti sheshojë duke imponuar një atmosferë festive.