Përfundimi i gjendjes së fatkeqësisë natyrore I ka dhënë fund edhe bllokimit të tenderave të institucioneve shtetërore. Këtë të enjte Agjencia e Prokurimit Publik u ka bërë me dije autoriteteve kontraktore se mund të vijojnë normalisht me planin e tyre të prokurimit pas asnjë kufizim. “Me përfundimin e afatit të shpallur për gjendjen e fatkeqësisë natyrore të gjitha autoritetet kontraktore mund të vijojnë procesin e prokurimit për mallra, punë ose shërbime për përmbushjen e nevojave të tyre sipas parashikimeve ligjore në fuqi për prokurimet publike” thuhet në njoftim. Me fillim të gjendjes së fatkeqësisë natyrore pas shpërthimit të pandemisë së Covid 19 dhe më pas zgjatjes së saj u bë me dije se institucionet nuk do të lejoheshin që të prokuronin me procedura të zakonshme. Ato lejoheshin të zhvillonin vetëm prokurime të lidhura me emergjencën e COVID-19 si dhe ato që konsideroheshin si jetike për komunitetet.