Kryeministri Edi Rama shpjegoi se heqja e mbështetjes direkte për naftën dhe zgjerimi i skemës kombëtare të bujqësisë këtë vit, u krye pas konsultimeve intensive dhe të drejtpërdrejta në të gjitha qarqet e fermerëve. Gjatë podcastit ‘Flasim’, Rama dha detaje të skemës së miratuar pak ditë më parë nga qeveria. “Për këtë arsye, skema rrit ndjeshëm mbështetjen për fermerët, jo thjesht në aspektin e volumit financiar, por edhe në aspektin e lehtësimit të kushteve për ta përfituar atë që çdo fermeri i takon nga skema dhe, njëkohësisht, duke financuar në ato drejtime prioritare që garantojnë më shumë produktivitet dhe fuqizim më të mirë të zinxhirit të vlerës. Për herë të parë përfshihen në skemë forma mbështetjeje të cilat nuk kanë qenë të përdorura deri më sot. Ndërsa një tjetër risi është nxitja e praktikave të qëndrueshme në bujqësi, përmes mbështetjes së metodave biologjike dhe afrimit me standardet europiane.”