Anëtarët e Parlamentit Evropian kanë hartuar një rezolutë lidhur me zgjedhjet e përgjithshme të mbajtura në Serbi që nga shumë vëzhgues janë gjykuar si të parregullta. Në këtë draft-rezolutë thuhet se zgjedhjet e mbajtura më 17 dhjetor nuk mund të konsiderohen të lira dhe të drejta. “Parlamenti Evropian ndjen keqardhje që zgjedhjet parlamentare dhe lokale të 17 dhjetorit 2023, kanë devijuar nga standardet ndërkombëtare dhe angazhimi për zgjedhje të lira dhe të ndershme, për shkak të keqpërdorimit të vazhdueshëm dhe sistematik të institucioneve dhe mediave nga zyrtarët për të fituar një avantazh të padrejtë dhe të pajustifikuar”, thuhet në fillim të draftit. “Këto zgjedhje nuk mund të konsiderohen të lira dhe të ndershme, jemi të alarmuar nga shkalla e përhapur dhe sistematike e manipulimit që kërcënoi integritetin e zgjedhjeve në Serbi”. Parlamenti Evropian i bën thirrje Komisionit Evropian që të dërgojë një mision ekspertësh në Serbi, që mund të përfshijë edhe ekspertë të OSBE-së, Komisionit të Venecias dhe Këshillit të Evropës, për të bërë një vlerësim të situatës, përfshirë zhvillimet pas zgjedhjeve. Kjo sipas tyre duhet të bëhet për të siguruar parakushte për nisjen e një dialogu social të domosdoshëm që do të çonte në rikthimin e besimit publik në institucione.