Izraeli dhe Hamas ranë dakord të zgjasin armëpushimin me dy ditë të tjera, duke hapur rrugën lirimit të një numri edhe më të madh pengjesh që mbahen nga grupi militant në Gazë. Në këmbim Izraeli do të lirojë të palestinezë të burgosur. Izraeli tha se do të përfshinte 50 femra palestineze në listën e të burgosurve të planifikuar për lirim nëse lirohen pengje të tjera izraelite nga Gaza, tha të martën zyra e kryeministrit Benjamin Netanyahu. Deklarata e Izraelit erdhi pasi zëdhënësi i Ministrisë së Jashtme të Katarit Majid Al Ansary tha se një armëpushim katër-ditor për të lejuar lirimin e pengjeve izraelite në këmbim të të burgosurve palestinezë, që do të skadonte të hënën, u zgjat për dy ditë të tjera. Ndërkohë ushtria izraelite njoftoi të hënën në mbrëmje se 11 pengje i ishin dorëzuar Kryqit të Kuq në Gazë dhe ishin nisur drejt territorit izrael. Izraeli e kishte lënë të hapur mundësinë e zgjatjes së armëpushimit me një ditë për çdo 10 pengje të liruara nga Hamasi. Pas njoftimit nga Katari - një ndërmjetës kyç në konflikt, së bashku me Shtetet e Bashkuara dhe Egjiptin - Hamasi konfirmoi se kishte rënë dakord për një zgjatje dy-ditore" të armëpushimit nën të njëjtat kushte".Sipas marrëveshjes fillestare, pritej që në total të liroheshin 50 pengje izraelite dhe që Izraeli të lironte 150 të burgosur palestinezë. Në tre ditët e para të armëpushimit, u liruan me dhjetëra persona të marrë peng, kryesisht gra dhe fëmijë. Deri tani janë liruar gjashtëdhjetë e dy pengje. Më parë, forcat izraelite liruan një person ndërsa dy të tjerë u gjetën të vdekur brenda Gazës. Besohet se Hamasi dhe grupe të tjera militante vazhdojnë të mbajnë peng rreth 175 persona, mjaftueshëm për ta zgjatur armëpushimin për dy javë e gjysmë. Në mesin e tyre ka dhe disa ushtarë izraelitë, për lirimin e të cilëve ka të ngjarë që militantët të bëjnë kërkesa shumë më të mëdha.