Zëvëndës kryeministri i Malit të Zi, Dritan Abazoviç këtë të premte erdhi në Shqipëri, ku u takua me disa nga autoritetet më të larta të politikës në vend, mes të cilëve edhe me kreun e qeverisë, kryeministrin Edi Rama. Lajmin e ardhjes së zyrtarit të lartë e bëri me dije vetë Rama, i cili përmes një postimi në rrjetet sociale e ka vlerësuar si një kënaqësi këtë takim të parë me Abazoviç. Kreu i vendit është shprehur se gjatë takimit dhe bashkëbisedimit me Abazoviçin ata kanë patur dakordësi në çdo pikë për të cilën kanë diskutuar. Abazovic dhe Rama diskutuan për ndërtimin e hekurudhës Dors-Podgoricë, autostradës Korridori Blu si dhe për urën që do lidhë Velipojën dhe Ulqinin. Përvec Ramës, zëvëndës kryeministri i Malit të Zi, gjithashtu u takua me Presidentin Ilir Meta, me kreun e Partisë Demokratike Lulzim Basha si dhe me ministrin e brendshëm Bledi Çuçin. Pas mbarimit të takimeve të tij, Abazovi bashkë me Lulzim Bashën ndanë me gazetarët cështjet më të rëndësishmë që u diskutuan. Dritan Abazoviç është shqiptari i parë që ka marrë një post kaq të rëndësishëm në qeverinë e Malit të Zi, pas zgjedhjeve të vitit të shkuar ku koalicioni ku bënte pjese partia e tij arriti të marrë 4 deputetë.